Um Olíudreifingu
Meginstarfsemi okkar er dreifing og birgðahald fljótandi eldsneytis, sala og þjónusta við eldsneytisbúnað.
Stofnað 1996
Olíudreifing var stofnuð m.a. til að sjá um dreifingu og birgðahald eigenda sinna á eldsneyti, sem á þeim tíma voru Olíufélagið hf. og Olíuverslun Íslands. Á fyrsta starfsdegi félagsins 1. janúar 1996 fór dreifingin af stað í Reykjavík, Hafnarfirði og Hvalfirði. Eftir það fóru staðirnir að bætast við einn af öðrum.
Birgðastöðvarnar eru staðsettar víðsvegar um landið með samtals 350 milljóna lítra geymarými.
Þann 1. nóvember 1999 tók félagið við starfseminni á Ísafirði og var þá komið með dreifingu alls fljótandi eldsneytis á landinu, að Keflavíkur- og Reykjavíkurflugvelli frátöldum. Olíudreifing afgreiðir eldsneyti bæði samkvæmt óskum eldsneytisseljenda og beiðnum frá viðskiptavinum.
Félagið rekur einnig bifreiðaverkstæði, járnsmíðaverkstæði, dælu- og rafmagnsverkstæði. Þau sjá um viðhald og uppbyggingu á eignum félagsins og tæknibúnaði þjónustustöðva.
Starfsfólk Olíudreifingar kom í upphafi nánast allt frá olíufélögunum tveimur eða umboðsmönnum þeirra.
Auk meginstarfsemi félagsins hefur það í gegnum tíðina annast viðhaldsverkefni fyrir ýmsa aðila. Um 130 manns starfa í dag hjá Olíudreifingu víðsvegar um landið. Félagið á og rekur meðal annars mikinn fjölda tankbíla, vörubíla og dráttarbíla, auk smærri bíla. Tankskipið Keilir, sem er 700 rúmmetra afgreiðslubátur, er einnig rekið af Olíudreifingu og flytur eldsneyti umhverfis landið.
